მენიუ დახურვა

კალაძე: ტაქსების რეფორმაზე არასწორ ინფორმაციას მიზანმიმართულად ავრცელებენ

ტაქსები

ტაქსების რეფორმასთან დაკავშირებით, მიზანმიმართულად ხდება არასწორი ინფორმაციების გავრცელება. ამის შესახებ დედაქალაქის მერმა სოციალურ ქსელში ვიდეოდიალოგის მიმდინარეობისას, ერთ-ერთი მოქალაქის შეკითხვის საპასუხოდ ილაპარაკა.

‘ტაქსების რეფორმა დავიწყეთ იმისთვის, რომ ეს სფერო მოწესრიგებული იყოს. სამწუხაროდ, გარკვეული პოლიტიკური  პარტიების მხრიდან საზოგადოებისთვის მიზანმიმართულად, არასწორი ინფორმაციის მიწოდება ხდება. პირველ რიგში, ეს რეფორმა მნიშვნელოვანია ტაქსის მძღოლებისთვის და ზოგადად, ქალაქისთვის, თუმცა მინდა კიდევ ერთხელ აღვნიშნო, რომ არავინ არავის ავალდებულებს და არაფერს აძალებს. არის ორი მიმართულება, რომლითაც შეუძლიათ მათ რომ ისარგებლონ: A კატეგორიის ლიცენზია და B კატეგორიის. 

მნიშვნელოვანია ის, რომ მივიღეთ გადაწყვეტილება გადაღებვის ხარჯებთან დაკავშირებით, რაც შეიძლება ადამიანებისთვის სერიოზული პრობლემა ყოფილიყო. მესმის, არსებული სოციალური მდგომარეობა. ძირითადად, ეს ადამიანები იმიტომ არიან ამ საქმიანობით დაკავებულები, რომ უჭირთ. მათ შორის ბევრია ისეთი, რომელიც დღის განმავლობაში სამსახურში მუშაობს და შემდეგ მგზავრების გადაყვანას ახორციელებს. ჩვენ ესეც გავითვალისწინეთ და ამ ადამიანებს რომ კიდევ ზედმეტი ხარჯი არ ჰქონოდათ, ვაუჩერების გადაცემა გადავწყვიტეთ. კომპანია, რომელმაც ჩვენს მიერ გამოცხადებულ აუქციონში გაიმარჯვა, თავის ვალდებულებას შეასრულებს და ტაქსის მძღოლებს გადაღებვაში თეთრი არ დაეხარჯებათ. მნიშვნელოვანია ისიც, რომ ტაქსის მძღოლები უფასო პარკინგით და ასევე, რეკლამის შემოსავლით ისარგებლებენ. ეს პირველ რიგში, მათი და მათი ოჯახების ეკონომიკურ მდგომარეობაზე იქნება ასახული“, – განაცხადა დედაქალაქის მერმა.

ასევე, როგორც თბილისის ვიცემერმა, ირაკლი ხმალაძემ აღნიშნა, რეფორმის გატარების აუცილებლობა სწორედ იმიტომ გაჩნდა, რომ ბაზარი დარეგულირდეს და ჯანსაღი კონკურენცია გაჩნდეს. 

‘რაც კი რეფორმა წამოვიწყეთ, პარკირების, ტაქსების თუ სატრანსპორტო სისტემის მოწესრიგების მიმართულებით, ოპოზიციური პარტიების მოწოდება არის, რომ გავჩერდეთ და არაფერი  გავაკეთოთ. ჩვენ „არაფრის“ საკეთებლად არ მოვსულვართ და საჭიროა ისეთი რეფორმების განხორციელება, რომელიც განავითარებს ჩვენს ქალაქს და ამ შემთხვევაში სატრანსპორტო სისტემას. დღეს, გვაქვს სრულად დერეგულირებული ტაქსის ბაზარი და არაჯანსაღი კონკურენცია, რაც ქმნის ე.წ. დემპინგურ ფასებს, მომსახურების ხარისხის გაუარესების ხარჯზე ხდება ფასების მინიმიზაცია. ამით, პირველ რიგში, ტაქსისტები ზარალდებიან. დღეს,  ტაქსის ბაზარი არ ეკუთვნით მხოლოდ ტაქსისტებს, ის ეკუთვნით ტაქსისტებს და აგრეთვე ადამიანებს, რომლებიც დამატებით შემოსავალს ეძებენ. ისინი არ არიან ტაქსისტები და ეს მათთვის პარალელური საქმიანობაა. ჩვენ ორივე კატეგორიის მომსახურების გამწევებს ვთავაზობთ იმავე ფორმატით სერვისის გაგრძელებას, უბრალოდ ყველაფერს თავის სახელს ვარქმევთ. არსებობს  A კატეგორიის, ე.წ. ქუჩის ტაქსი, რომელიც ქუჩიდან ახდენს მგზავრის აყვანას და არის ბრენდირებული და არსებობს B კატეგორია, რომელსაც ვიზუალის, ფერის სტანდარტი არ აქვს, არც მანათობლის გამოყენება სჭირდება და ეკრძალება კიდევაც, შეუძლია აპლიკაციის მეშვეობით, ე.წ. „რაითშეარინგის“ პრინციპში ჩაერთოს და გააგრძელოს შემოსავლის მიღების მიზნით, მგზავრის გადაყვანა“, – განაცხადა ირაკლი ხმალაძემ.

ასევე, როგორც თბილისის ვიცემერმა, ირაკლი ხმალაძემ აღნიშნა, რეფორმის გატარების აუცილებლობა სწორედ იმიტომ გაჩნდა, რომ ბაზარი დარეგულირდეს და ჯანსაღი კონკურენცია გაჩნდეს. რაც შეეხება რეგულაციების გადახედვის საკითხს, ვიცემერის თქმით, რეფორმის გადავადება არ იგეგმება და მისი მეორე ეტაპი მიმდინარე წლის პირველი ოქტომბრიდან დაიწყება. 

‘დღეს, თუ ტაქსის ბაზარზე მოძრაობს 27 000 ლიცენზირებული ტაქსი, ეს გაიყოფა სულ ცოტა ორზე და ქუჩის ტაქსის ბაზარს მხოლოდ ბრენდირებული ტაქსები დაიკავებენ. თუ ახლა ვინმე ფიქრობს, რომ მანქანას არ გადაღებავს  იმიტომ, რომ რეფორმამ გადაიწიოს, ჩვენ ამ რეფორმის გადავადება სწორად არ მიგვაჩნია. ერთი წლის წინ ვთქვით ამის შესახებ და ტაქსის მძღოლებს მოსამზადებელი დროც მივეცით“, – აღნიშნა ირაკლი ხმალაძემ.

ვიდეოდიალოგი თბილისის მერის ოფიციალურ facebook-გვერდზე მიმდინარეობდა. კახა კალაძე მოქალაქეთა შეკითხვებს თბილისის ვიცემერ ირაკლი ხმალაძესთან და ჩუღურეთის, კრწანისის, მთაწმინდის, ნაძალადევისა და ისნის რაიონების გამგებლებთან ერთად პასუხობდა. 

2019 წლის პირველი ოქტომბრიდან ტაქსებისთვის ახალი რეგულაციები შედის ძალაში. კერძოდ, ტაქსი A და B კატეგორიებად დაიყოფა. რა განსხვავებაა მათ შორის შეგიძლიათ იხილოთ ამ ბმულზე. 

წყარო

loading…


მსგავსი სიახლეები